Борче Грозданов

Пориви

ПОРИВИ

Добре дојдовте

Добре дојдовте во мојот свет,
во кој Ви се отворам преку зборот,
но, Ве молам, не ругајте ме,
зашто
зборот може да боли,
но
поубав е кога моли,
зборот не смее да пече,
зборот е за вистината да ја рече,
зборот не треба тајна да влече
и не треба да го рече
оној кому умот не му сече.
Зборот може да е желба,
зборот не треба да е повелба зашто
зборот не треба да пече,
зашто
зборот е за вистината да ја рече.

Чекори

Тапо одекнување на асфалт
‘рскот на камења,
неподнослив, леплив воздух
од кој тешко дишам..
Механизмот е вклучен беспрекорно
и секој миг се подвивам под него,
немајќи право на промена
На асфалтот крв, темноцрвена, невина, како секогаш
Што крие таа?
Неостварена желба за живот,
или нечија желба за свежа крв?
Одблесокот на светилките е придушен,
но ја оцртува мојата сенка
од која често бегам и се плашам.
Не открив што е со крвта,
но, следејќи ја својата сенка,
стигнав до моето дувло
со чувство дека тоа е мојата крв,
и додека во ушите ми одекнуваше
'рскотот на камењата: твоја е, твоја е,
се струполив на леглото во моето дувло
и смеејќи се, заплакав..

Да живеат камелеоните!

Да живеат КАМЕЛЕОНИТЕ!

Во нив е минатото, сегашнината и иднината,
Но, и небиднината!

Тие ги менуваат боите
Најчесто на штета на своите

Благодат им е злото на другиот,
На другиот, но не и туѓиот

Никогаш не го виткаат 'рбетот-го немаат!
Се движат само кога земаат

Ним ништо не им можат шпионите
Ах, колку се моќни К А М Е Л Е О Н И Т Е!

Пред нив клечат и шампионите
- Блазе си им на К А М Е Л Е О Н И Т Е!

Кога мозокот мисла им раѓа
Дури и држава пропаѓа.

Нека му ја мислат милионите
- Ова е век на К А М Е Л Е О Н И Т Е!

Поздрав до вечноста

Посеј ги ѕвездите што ги имаш и ќе ги имаш,
за да нè зачуваш од минливоста,
од заборавот и стравот.
Чувај ги душите летнати одовде
кои ни ги кријат гревовите
и ги штитат нашите суети.
Чувај ни ги осумдесеттината цветови,
кои со животот ни овозможија да си вообразиме
дека сме со нив и над нив.
Чувај ни ја премислата,
згази ја омразата,
за да бидеме тоа што сме - дел од тебе
Однапред фала ти,
ти една и единствена, вистинита
ВЕЧНОСТ!